5 ffordd y gall eich clwb chwaraeon elwa o fod yn fwy cynaliadwy

Gwella eich enw da

Bydd cymryd camau bach i fod yn fwy cynaliadwy yn gwella eich enw da gyda noddwyr a phartneriaid.

Llwyddodd Clwb Rygbi Uplands Abertawe i hawlio’r penawdau hyd yn oed pan wnaethon nhw roi’r gorau i ddefnyddio plastig untro.

Dywedodd Trysorydd y Clwb, Peter Hansford:

“Mae pobl yn fwyfwy angerddol am yr amgylchedd ac maen nhw’n ymwybodol o’r hyn rydyn ni’n ei wneud fel clwb. Ac mae hefyd yn cael ei gydnabod gan ein cyllidwyr ni. Mae URC a Chwaraeon Cymru yn gofyn beth rydyn ni’n ei wneud i fod yn fwy cynaliadwy yn eu ceisiadau am gyllid.”

Cyngor Doeth: Cadwch gofnod o’r holl gamau rydych chi’n eu cymryd i’w cynnwys mewn ceisiadau am gyllid yn y dyfodol.

Creu teimlad da

Gall cydweithio fel clwb ar fentrau amgylcheddol gyfeillgar hybu morâl ymhlith aelodau a gwirfoddolwyr.

Mae Rhwyfwyr Llandysulyn gwneud eu rhan yn sicr i lanhau Afon Teifi. Yn eu canŵs, eu rafftiau a’u caiacs, maen nhw'n clirio cymaint o sbwriel â phosib.

Dywedodd Joey Chapman o’r clwb: “Fe gawson ni fwy na 50 o bobl wedi dod lawr i helpu. Mae'n dod â ni at ein gilydd fel clwb ac fe gymerodd lawer o'r rhieni ran. Rydyn ni wrth ein bodd yn mynd â phobl allan i’r afon ac rydyn ni’n teimlo ei bod hi’n bwysig iawn helpu i’w gwneud yn lle glanach a’i gwarchod hi rhag difrod fel bod cenedlaethau’r dyfodol yn gallu ei mwynhau.”

Cyngor Doeth: Cofiwch fynd ati i ofyn i'ch aelodau oes unrhyw brosiectau amgylcheddol y gallech chi ymgymryd â nhw fel clwb.

Cynyddu ymgysylltu cymunedol

Mae gweithio i wella eich amgylchedd lleol yn rhoi eich clwb chwaraeon chi wrth galon y gymuned. Mae bod yn fwy cynaliadwy yn dangos bod yr ardal o'ch cwmpas chi’n bwysig i chi.

Mae Clwb Rygbi’r Trallwng, ynghyd â Phonthafren – elusen sy’n helpu pobl gyda’u hiechyd meddwl – yn trefnu sesiynau casglu sbwriel o amgylch y dref yn rheolaidd ac mae hefyd wedi cefnogi cynghorwyr lleol gyda phrosiectau plannu coed. Dywedodd Huw Williams, Swyddog Cymuned a Lles y clwb:

“Mae’r clwb wedi cael ei gydnabod am ei ymdrechion gan y gymuned leol. Mae cynghorydd lleol wedi ymgysylltu mwy â’r hyn rydyn ni’n ei wneud ers i ni ddechrau hyn. Maen nhw wedi’n gweld ni’n casglu sbwriel ac maen nhw wedi gofyn a fydden ni’n gallu helpu gyda phlannu coed o ganlyniad. Mae ymuno â Phonthafren yn ffordd wych o gael pobl newydd i gymryd rhan ac rydyn ni’n defnyddio’r cyfle i ddweud popeth wrthyn nhw am ein rhaglen rygbi cerdded ni.”

Cyngor Doeth: Holwch a oes mentrau lleol y gallwch chi eu cefnogi ac annog elusennau lleol i gymryd rhan.

Felly sut gall eich clwb chi ddechrau ar ei siwrnai cynaliadwyedd?

Ewch ati i roi cychwyn i’ch sgwrs gynaliadwy – os ydych chi’n glwb neu’n sefydliad chwaraeon, ewch i’r hwb ar-lein newyddsydd â gwybodaeth ddefnyddiol iawn, gan gynnwys taflenni gwaith, fideos a chanllawiau. Hefyd, efallai y byddwch chi eisiau...

• Ystyried cynnal hyfforddiant llythrennedd carboni ddeall eich ôl troed carbon.
• Meddwl am rai camau bach y gallwch chi eu cymryd i leihau eich effaith amgylcheddol.
• Cael eich ysbrydoli gan Glwb Bowlio Pentyrcha chreu polisi amgylcheddol. Mae Run4Wales hefyd wedi datblygu cynllun gweithredu gwyrdd.