Bachgen yn ei arddegau a chanddo Syndrom Down yn codi pŵer eto ar ôl llythyr emosiynol yn ystod y cyfyngiadau symud

Gyda Chymru bellach ar lefel rhybudd un a’r cyfyngiadau bron wedi'u codi'n llawn, mae'r bachgen yn ei arddegau wedi dychwelyd i'r gampfa ac mae ganddo uchelgais i gystadlu ar lefel ryngwladol i godi pŵer yn y Gemau Olympaidd Arbennig, sefydliad mwyaf y byd ar gyfer plant ac oedolion ag anableddau deallusol.

Mae Bleddyn yn hyfforddi yn Academi Cryfder Cymru, canolfan achrededig ar gyfer campau Olympaidd Arbennig Prydain Fawr a'r unig ganolfan Codi Pŵer Olympaidd Arbennig yng Nghymru. Mae Academi Cryfder Cymru yn fenter gymdeithasol gynhwysol, sy'n cael ei rhedeg gan wirfoddolwyr, gan gynnig cyfleoedd i bawb gan gynnwys y rhai ag anableddau neu namau deallusol. 

Wrth drafod ei fab, dywedodd Steff Gibbs: "Mae bod mewn amgylchedd cynhwysol lle mae'n gallu hyfforddi gydag eraill wedi rhoi cyfle i Bleddyn fagu hyder, dysgu bod yn gwrtais a dysgu sgiliau bywyd defnyddiol. Mae'n debyg mai bod i ffwrdd o'r ganolfan gymdeithasol hon oedd y rhan anoddaf o'r cyfyngiadau symud.

"Mae Bleddyn yn uchelgeisiol gyda phopeth mae'n ei wneud ond mae wir wedi gosod ei fryd ar godi pwysau. Nid dim ond yn gorfforol y mae’r hyfforddiant wedi ei helpu, er bod ei gryfder a'i dechneg wedi gwella'n aruthrol, mae ei sgiliau cymdeithasol wedi gweld budd mawr."

Mae adroddiad diweddar gan Iechyd Cyhoeddus Cymru yn dangos bod pobl ledled Cymru yn dal i brofi teimladau o unigedd ac unigrwydd ond bod cynyddu gweithgarwch corfforol gydag elfen gymdeithasol yn effeithiol o ran gwella canlyniadau iechyd meddwl.

Wrth drafod manteision dychwelyd i chwaraeon, dywedodd Sarah Powell, Prif Swyddog Gweithredol Chwaraeon Cymru: “Yn Chwaraeon Cymru, rydym yn annog pobl ledled y wlad i ddychwelyd i'r gêm yn eu ffordd eu hunain, boed hynny'n rhan o dîm eto, mynd allan ac ail-gysylltu â'r gymuned leol, mwynhau'r teimlad hwnnw ar ôl ymarfer neu gael hwyl. Gyda'r Gemau Olympaidd ar ein sgriniau ar hyn o bryd ac yn gobeithio ysbrydoli cenedl, mae stori Bleddyn yn enghraifft galonogol o'r effeithiau cadarnhaol y mae ymarfer corff yn eu cael ar les corfforol a meddyliol.”

Er mwyn helpu i sicrhau bod pobl yn teimlo eu bod yn cael eu cefnogi a'u cymell i ddychwelyd i ymarfer corff, yr haf hwn mae Chwaraeon Cymru wedi lansio ymgyrch o'r enw #NôlynyGêm gyda'r nod o ysbrydoli pobl i fwynhau chwaraeon ac ymarfer corff eto. 

I gael gwybod mwy am sut y gallwch fod nôl yn y gêm, ewch i https://www.chwaraeon.cymru/nol-yn-y-gem/ neu ddefnyddio’r hashnod #NôlynyGêm ar y cyfryngau cymdeithasol.