Yma yn Chwaraeon Cymru, rydyn ni bob amser yn edrych ymlaen at Ddydd Gŵyl Dewi. Ac i’ch helpu chi i fynd i ysbryd y diwrnod, rydyn ni wedi llunio rhestr o weithgareddau y gallwch chi eu gwneud i ddathlu popeth Cymreig.
Mae ein rhestr ni wedi cael ei hysbrydoli gan gyngor Dewi Sant ei hun. Ei ddywediad enwocaf yw “Gwnewch y pethau bychain”.
Mae gair bach o ddiolch yn mynd yn bell iawn! Ar Ddydd Gŵyl Dewi eleni, beth am roi amser i ddweud diolch wrth eich hyfforddwyr a’ch gwirfoddolwyr. Dywedwch wrthyn nhw pam rydych chi'n eu gwerthfawrogi nhw neu gadewch i weithredoedd ddweud mwy na geiriau, a thorchwch eich llewys. Cyrhaeddwch yn gynnar a chynnig help llaw. Mae’n bwysig iawn ein bod ni’n gwerthfawrogi’r rhai sy’n gwneud i chwaraeon ar lawr gwlad ddigwydd yng Nghymru.
Weithiau, mae angen ychydig o hwb i annog rhywun i roi cynnig ar gamp newydd neu i wneud rhywfaint o ymarfer corff. Felly, ar Ddydd Gŵyl Dewi eleni, beth am wahodd ffrind i ymuno â chi yn eich clwb chwaraeon lleol neu awgrymu trip i’ch pwll nofio agosaf neu fynd i redeg gyda’ch gilydd? Mae gwneud gweithgarwch corfforol yn helpu i gael ein endorffinau i lifo – sef cemegau teimlo'n dda yr ymennydd. Mae'n ein helpu ni i deimlo'n hapusach, yn fwy hamddenol ac yn llai pryderus. O gynnwys cwmni da, efallai y byddwch yn gwneud ffafr fawr â ffrind.
Ychwanegwch dipyn o hwyl at eich hyfforddiant a defnyddio ychydig o Gymraeg! Does dim rhaid i chi fod yn siaradwr Cymraeg rhugl i siarad ychydig o Gymraeg. Dyma rai geiriau ac ymadroddion syml i chi roi cynnig arnyn nhw…
Eisiau mynd gam ymhellach? Cofrestrwch gyda learnwelsh.cymru – mae cyrsiau am ddim ar gael hyd yn oed! Gwych!
Os oes gennych chi hen git neu offer nad ydych chi’n eu defnyddio mwyach, beth am helpu i fynd i’r afael ag anghydraddoldebau a’u rhoi i rywun arall? Wedi tyfu allan o'ch esgidiau pêl droed? Raced tennis yn hel llwch? Wedi symud ymlaen o offer iau? Gwnewch y pethau bychain a hysbysebwch unrhyw git neu offer diangen ar dudalen Facebook eich clwb lleol. Neu eu cyfrannu at Lord’s Taverners a fydd yn sicrhau eu bod yn helpu rhywun yn y DU neu dramor.
Mae gennym ni ddigonedd o ddewis yng Nghymru ar gyfer teithiau cerdded hardd a does dim un amser mwy pleserus o’r flwyddyn na phan fydd y cennin Pedr yn eu gogoniant. Ewch i’ch parc agosaf i weld ein blodyn cenedlaethol yn ei flodau neu i un o nifer o lefydd yr Ymddiriedolaeth Genedlaethol yng Nghymru.
Os yw’n well gennych chi fynd oddi ar y grid, fe allech chi ddewis un o lwybrau cerdded gorau Cymru i fwynhau ysblander y wlad hardd yma.
Am bwyntiau Dydd Gŵyl Dewi ychwanegol, chwiliwch am restrau chwarae o gerddoriaeth Gymraeg. O Adwaith i Yma O Hyd a phopeth yn y canol, beth am gael artistiaid Cymreig i fod yn drac sain i’ch chwaraeon chi.
Gall gwneud y pethau bychain pan ddaw i arbed ynni wneud gwahaniaeth mawr. Nid yn unig y bydd yn gwneud eich clwb yn fwy ecogyfeillgar, bydd hefyd yn arbed arian i chi hefyd.
Felly gosodwch rai goleuadau synhwyro symudiadau yn eich ystafelloedd newid, trowch y gwres i lawr, diffoddwch y socedi a gwnewch wahaniaeth ar Ddydd Gŵyl Dewi eleni.
Dyma gyngor doeth i helpu eich clwb i fod yn fwy ecogyfeillgar.
Estynnwch am eich hetiau bwced a’ch crysau cochion oherwydd dim ots pa gamp rydych chi’n ei chwarae neu sut rydych chi’n mynd ati i ymarfer, byddwch yn falch eich bod chi’n Gymro neu’n Gymraes. Efallai ein bod ni'n genedl fechan, ond rydyn ni'n bwerus iawn!
Rhowch wybod i ni os byddwch yn penderfynu dilyn unrhyw un o'n hawgrymiadau. Fe fyddem wrth ein bodd yn clywed am hynny. Cysylltwch â ni ar Facebook neu Twitter.
Mae’r bencampwraig focsio Lauren Price wedi mynd yn ôl at ei gwreiddiau i weld sut mae cyllid y Loteri…
Dyma restr lawn o’r prosiectau sydd wedi’u cefnogi gan £3.5m o gyllid gan Lywodraeth Cymru.
Wedi’i neilltuo gan Chwaraeon Cymru, bydd y cyllid yn ehangu mynediad at chwaraeon a gweithgarwch corfforol…