Mae Ystafell Taf yng Nghanolfan Genedlaethol Chwaraeon Cymru yn barod i drawsnewid unwaith eto yn gartref i Hwb Dadansoddi Perfformiad Tîm Prydain Fawr yn ystod y Gemau Olympaidd ym Mharis eleni.
O 26 Gorffennaf ymlaen, bydd chwe dadansoddwr perfformiad o Gaerdydd yn astudio pob eiliad o’r Gemau, gan gynnwys dau o’n cydweithwyr ni yn yr Athrofa, Carys Jones a Jen Roach.
Fe fyddant yn treulio'r tair wythnos yn cynnig cefnogaeth i'r hyfforddwyr a'r athletwyr ym Mharis gydag adborth fideo byw a dadansoddiad technegol. Mae'r gefnogaeth hon yn rhan hanfodol o sicrhau bod ein hathletwyr ni’n perfformio ar eu gorau pan mae hynny bwysicaf iddyn nhw.
Hwn fydd yr eildro i Chwaraeon Cymru groesawu Hwb Dadansoddi Perfformiad Tîm Prydain Fawr, gydag Ystafell Taf yn gartref i’r hwb yn ystod Gemau Olympaidd Tokyo 2021 hefyd – ac er y bydd y trefniant yn eithaf tebyg eto, fe fydd yr awyrgylch yn wahanol iawn!
Dywedodd Carys: “Fe gynhaliwyd y Gemau diwethaf yn ystod cyfnod pan oedd cyfyngiadau COVID mewn grym o hyd. Cyfunwch hynny gyda'r gwahaniaeth amser ac roedd yn gallu bod yn dawel iawn ar adegau!
“Fe fydd yn wych gallu cael mwy o bobl i gymryd rhan eleni – fe fyddwn ni’n gallu gweithio’n agosach gyda’n gilydd ac yn agosach gyda chynrychiolwyr y chwaraeon hefyd. Rydw i'n edrych ymlaen yn fawr at amgylchedd mwy cymdeithasol. Os oes unrhyw un eisiau dod draw i weld beth rydyn ni’n ei wneud, dewch i’n gweld ni yn Ystafell Taf!”
Ac nid dyma'r unig ddadansoddi perfformiad fydd Jen yn cymryd rhan ynddo yn ystod y Gemau.
“Rydw i’n gyffrous iawn am fod yn cefnogi gyda dadansoddi’r perfformiadau yn ystod y Gemau Paralympaidd eleni, hefyd.” Ychwanegodd, “Fe fyddaf yn mynd i Lundain i gefnogi ein para-athletwyr ni ym Mharis yn ddiweddarach ym mis Awst.”
Fel gyda Tokyo, mae llawer iawn o drefniadau technegol a gweithredol i sicrhau bod y tîm yng Nghaerdydd yn gallu gweithio'n agos gyda'u cydweithwyr ym Mharis a rhoi adborth yn gyflym.
Ychwanegwch at hynny lety a phrydau bwyd y tîm, ac mae’n amlwg na fyddai’r Hwb Dadansoddi Perfformiad yn weithredol heb gefnogaeth nifer o gydweithwyr yn Chwaraeon Cymru.
“Rhaid i mi ddweud diolch yn fawr iawn i fy nghydweithwyr i yn y tîm arlwyo, pawb yn yr adran Datrysiadau Technoleg a’r tîm yn y Ganolfan Genedlaethol,” ychwanegodd Carys. “Heb eu gwaith caled nhw, ’fydden ni ddim yn gallu cynnal yr Hwb Dadansoddi yma, ac mae cael eu cefnogaeth nhw’n golygu llawer i bawb yn y tîm.”