Cyllid y Loteri Genedlaethol yn rhoi cychwyn i glwb pêl droed merched

Mae Leeann Bekker, Trysorydd Coity Chiefs, yn cydnabod na fyddai’r clwb yn bodoli fel y mae heddiw heb y Loteri Genedlaethol. Meddai: “Pan ddaethon ni i’r clwb, doedd dim offer. Roedd gennym ni bobl, ond dim peli; ’fydden ni ddim wedi goroesi heb gyllid y Loteri Genedlaethol a gafodd ei ddyfarnu gan Chwaraeon Cymru.

“Mae anghydraddoldeb yn parhau i fodoli mewn pêl droed, felly roedd yn bwysig iawn i ni bod y clwb yn gallu parhau i weithredu. Mae’r merched sy’n dod yn teimlo eu bod nhw’n perthyn yma, maen nhw’n gallu mynegi eu hunain yn rhydd, datblygu eu sgiliau, meithrin cyfeillgarwch a bod yn nhw eu hunain heb bresenoldeb pwysau neu stereoteipiau sy’n ymwneud â rhywedd.”

Mae gan y merched ifanc yn Coity Chiefs fodelau rôl benywaidd ym mhob man wrth edrych o gwmpas y clwb.

Mae eu pwyllgor yn cynnwys mwy o ferched na dynion, ac mae hyfforddwyr benywaidd a gwrywaidd yn gweithio gyda phob grŵp oedran hefyd. I'r cyfranogwyr, mae'r math yma o gynrychiolaeth yn hynod bwysig.

“Mae’n anhygoel i’r genethod weld bod merched yn gallu gwneud pob rôl mewn pêl droed, o hyfforddi i ddyfarnu, a hefyd rôl weinyddol fel fy un i – mae’n rhaid iddyn nhw allu ei weld e er mwyn credu ei fod yn opsiwn iddyn nhw.” meddai Leeann.

“Mae’n rhoi rhywbeth i’r merched anelu ato. Roedd dau o’n haelodau hŷn ni’n awyddus i ddechrau hyfforddi, ac wedi gallu cael hyfforddiant fel hyfforddwyr diolch i arian y Loteri Genedlaethol.”

Ers iddyn nhw dderbyn yr arian, mae’r clwb wedi denu mwy fyth o chwaraewyr, ac maen nhw nawr yn rhoi cyfle i fwy na 130 o ferched yr ardal chwarae pêl droed bob wythnos.

Mae'r hyfforddiant a'r offer gwell yn golygu bod y merched yn gallu mwynhau chwarae o ansawdd gwell hefyd, a theimlo'n frwdfrydig i ddal ati i ddod yn ôl bob wythnos.

Mae’r clwb hefyd yn gweithio gyda Chymdeithas Bêl Droed Cymru i gynnig sesiynau ‘Huddle’, gan roi blas o bêl droed i ferched mor ifanc â phedair oed mewn awyrgylch hwyliog, hamddenol.

Ac mae pobl wedi dechrau sylwi ar waith gwych y Chiefs. Yng Ngwobrau Pêl Droed Llawr Gwlad McDonald’s FA Cymru yn ddiweddar, dyfarnwyd gwobr Clwb Cymunedol y Flwyddyn i Coity Chiefs am bopeth mae wedi’i wneud i roi cyfle i enethod ym Mhen-y-bont ar Ogwr chwarae.

Mae Leeann yn canmol Chwaraeon Cymru a’r Loteri Genedlaethol am helpu’r clwb i ennill y wobr yma, gan ddweud: “Dydyn ni ddim yn gallu credu’r peth a dweud y gwir! Roedd yn noson ryfeddol, ac roedden ni wrth ein bodd yn cael ein cydnabod yn y digwyddiad mawreddog yma.

“Fydden ni ddim wedi bod yno oni bai am grant y Loteri Genedlaethol gan Chwaraeon Cymru.”

Fe fydd y Loteri Genedlaethol yn dathlu ei phen blwydd yn 30 oed ar 19 Tachwedd. Ers rhyddhau’r peli am y tro cyntaf yn 1994, mae mwy na £356m o gyllid y Loteri Genedlaethol wedi cael ei fuddsoddi mewn chwaraeon yng Nghymru drwy Chwaraeon Cymru.

Diolch i chwaraewyr y Loteri Genedlaethol, mae mwy na £30 miliwn yn cael ei godi bob wythnos at achosion da, gan gynnwys y cyllid hanfodol sy’n mynd i chwaraeon yng Nghymru. Felly, os ydych chi wedi chwarae’r Loteri Genedlaethol yn ystod y 30 mlynedd diwethaf, rydych chi wedi helpu i wneud gwahaniaeth i blant, cymunedau, hyfforddwyr, clybiau ac athletwyr Cymru.