Bydd cyfnod byr ar gael i ymgeiswyr gyflwyno eu hawliadau – mae’r ceisiadau’n agor ar wefan Chwaraeon Cymru am hanner dydd, dydd Iau 26 Tachwedd a byddant yn cau am 5pm ddydd Mercher 9 Rhagfyr.
Mae cyfarwyddyd llawn ynghylch pwy sy’n gymwys i wneud cais i’r Gronfa Gweithwyr Llawrydd Chwaraeon, a sut i ymgesio, ar gael yn www.chwaraeon.cymru/cronfagweithwyrllawrydd.
Mae'r cyllid o £3m yn rhan o Becyn Adfer Chwaraeon a Hamdden cyffredinol gwerth £14m a ddyrannwyd gan Lywodraeth Cymru i Chwaraeon Cymru fel bod posib diogelu sefydliadau, cyfleusterau a swyddi chwaraeon.
Dywedodd Sarah Powell, Prif Weithredwr Chwaraeon Cymru.: "Y gronfa hon yw'r gyntaf o'i bath yn y DU ar gyfer gweithwyr llawrydd chwaraeon, ac mae'n arwydd clir arall o'r pwysigrwydd y mae Llywodraeth Cymru yn ei roi i chwaraeon a'u gallu i wneud gwahaniaeth cadarnhaol.
"Mae cymaint o unigolion gweithgar yng Nghymru sy'n gwneud bywoliaeth o hyfforddi, rhedeg gwersylloedd ymarfer, addysgu dosbarthiadau ffitrwydd, a gwneud pob math o bethau eraill i'n cadw ni’n actif.
“Gan weithio yng nghalon y cymunedau, maen nhw’n gwneud cyfraniad arwyddocaol at y sector chwaraeon. Ond, fel pawb arall, mae’r pandemig wedi eu taro’n galed iawn.
“Rydyn ni’n gwerthfawrogi na fydd £1,500 yn talu am yr holl golledion ariannol y mae llawer wedi'u dioddef, ond rydyn ni’n gobeithio y bydd yr arian yma’n cyfrannu rhywfaint at helpu i sicrhau y gall yr unigolion yma aros yn y sector, gan barhau i ddefnyddio eu doniau i wella bywydau pobl eraill."
Ychwanegodd Sarah: "Gan ein bod ni am gael y taliadau allan i ymgeiswyr llwyddiannus cyn gynted â phosib, yn enwedig gyda'r Nadolig yn agosáu, mae'r ffenest ar gyfer ceisiadau yn eithaf byr. Felly, rydyn ni’n annog ymgeiswyr i ddarllen y canllawiau ar ein gwefan ni’n ofalus er mwyn sicrhau eu bod yn cynnwys yr holl wybodaeth ofynnol gyda'u cais."
Mae'r £1,500 ar gael i weithwyr llawrydd a gweithwyr hunangyflogedig yng Nghymru y mae eu gwaith yn cefnogi pobl yn uniongyrchol i fod yn actif, fel hyfforddwyr chwaraeon, hyfforddwyr personol, hyfforddwyr ffitrwydd a chyfarwyddwyr dawns. Nid yw ar gael i weithwyr llawrydd eraill sy'n gweithio yn y diwydiant, fel awduron chwaraeon, sylwebyddion, ffotograffwyr, therapyddion chwaraeon a maethegwyr.
