Mae gwyliau'r ysgol bron yma. A chyda’n hathletwyr Cymreig yn ysbrydoli’r genedl ym Mharis 2024, rydyn ni wedi rhoi rhai syniadau at ei gilydd i gael y teulu cyfan i fod yn actif am ddim yng Nghymru.
Mae ymarfer corff yn ffordd wych o dreulio amser gyda’ch gilydd a does dim rhaid torri’r banc…
1. Ewch i’ch pwll nofio lleol – am ddim
Ydych chi wedi cael eich ysbrydoli gan Matt Richards yn y Gemau Olympaidd? Yna dyma ychydig o newyddion da. Gall plant fynd i nofio am ddim yng Nghymru. Do, rydych chi wedi clywed yn iawn.
Mae nofio yn ymarfer corff gwych i’r corff cyfan. Mae hefyd yn lleihau lefelau straen ac yn lleihau gorbryder. Felly, paciwch eich bagiau nofio a manteisiwch i’r eithaf ar nofio am ddim i bawb dan 16 a thros 60 drwy gydol yr haf.
Cysylltwch â'ch awdurdod lleol i ddarganfod pa opsiynau nofio am ddim sydd ar gael yn eich ardal chi.
2. Mynd ar eich beic
Ymunwch â’r grŵp cryf o feicwyr o Gymru sy’n cynrychioli Tîm Prydain Fawr yn y felodrom ym Mharis 2024 a mynd ar eich beic yr haf hwn. Os nad ydych chi’n siŵr ble i fynd, mae gwefan Croeso Cymru yn awgrymu llawer o lwybrau beicio heb lawer o draffig a chyfeillgar i deuluoedd.
Hefyd, mae'r feicwraig mynydd Olympaidd, Ella Maclean Howell yn argymell digon o lwybrau beicio mynydd a thraciau pwmp BMX ledled Cymru. Dim beic? Mae rhai cynlluniau ailgylchu beiciau am ddim yng Nghymru fel Free Bikes 4 Kids yng Nghasnewydd a Chynllun Beiciau Am Ddim Grŵp Ynni Trefaldwyn sy’n atal beiciau rhag mynd i safleoedd tirlenwi ac i gartref da yn lle hynny.
Gallwch hefyd ddod o hyd i feic am ddim ar Facebook Marketplace a Gumtree – cofiwch wneud yn siŵr ei fod yn gweithio’n iawn neu ewch i’ch caffi atgyweirio agosaf os oes arnoch chi angen rhywfaint o gyngor.
3. Padlfyrddio
Efallai nad yw'n gamp Olympaidd ond ni fyddai unrhyw restr o bethau i'w gwneud yr haf yma yn gyflawn heb badlfyrddio. Yn boblogaidd iawn, mae'n llawer o hwyl ond gwnewch yn siŵr eich bod chi'n cadw'n ddiogel ar y dŵr. Mae gan Canŵio Cymru wybodaeth a chyngor diogelwch gwych ac mae hefyd yn cynnig cyrsiau i'ch rhoi chi ar ben ffordd.
Fel arall, chwiliwch am glwb yn eich ardal chi – yn aml mae ganddyn nhw fyrddau sbâr ar gael a thripiau padlo wythnosol.
