Mae ein hamcan yn syml – pob person yng Nghymru yn Llythrennog yn Gorfforol.
Sgiliau Corfforol + Hyder + Cymhelliant + Gwybodaeth + Dealltwriaeth = Llythrennedd Corfforol
Gyda’r elfennau yma mae person yn fwy tebygol o fod yn llythrennog yn gorfforol – bod yn hapus, iach a hyderus – a hefyd cael yr adnoddau i fwynhau bod yn actif.
Pan mae plentyn yn dysgu darllen, mae’n dysgu geiriau i ddechrau, fel fi, ti, ci. Yn yr un ffordd, wrth i blentyn ddysgu sgiliau corfforol, mae’n dysgu sgiliau fel sut i redeg, neidio, taflu a chadw cydbwysedd.
Wedyn mae plant yn gosod y geiriau gyda’i gilydd i greu brawddegau a’u darllen. Yn yr un ffordd, mae’r sgiliau corfforol yn cael eu cysylltu i greu cymalau a pherfformio gweithgareddau fel reidio beic, nofio neu wneud naid drebl.
Mae datblygu’r sgiliau priodol fel eu bod yn gallu rhoi cynnig ar unrhyw beth mewn amgylchedd hwyliog a diogel yn golygu y bydd plentyn yn tyfu i fyny gan fwynhau chwaraeon a gweithgarwch corfforol.
Bydd y profiadau positif yma’n galluogi’r plentyn i feithrin cymhelliant cynhenid, a hefyd hyder yn ei allu, i fod eisiau bod yn actif yn gorfforol bob amser.
Bydd yn datblygu i fod yn oedolyn sydd â’r sgiliau angenrheidiol i gymryd rhan mewn chwaraeon a gweithgarwch corfforol a’u mwynhau drwy gydol ei fywyd, ar ba lefel bynnag mae’n ei dewis, fel hamdden neu’n gystadleuol.
Yr elfen bwysig yn hyn yw bod y plentyn yn dod i gysylltiad â phrofiadau positif, hwyliog a diogel, gan feithrin ei gymhelliant naturiol tra mae’n ifanc, pryd bydd yn fodlon rhoi cynnig ar unrhyw beth!
Mae’n hanfodol cael ‘Gwybodaeth a Dealltwriaeth’ o ran sut i drosglwyddo sgiliau a hyder i wahanol amgylcheddau ac amgylcheddau’n newid, ac i sefyllfaoedd mewn bywyd.
Bydd hyn yn creu person mwy cyflawn sy’n gallu mwynhau amrywiaeth o chwaraeon a gweithgareddau.
Nid dim ond i bobl ifanc mae llythrennedd corfforol yn berthnasol. Mae’n siwrnai o enedigaeth, yn ystod y cyfnod yn yr ysgol, pan yn oedolyn ac yn nes ymlaen mewn bywyd – gyda’r profiadau ar hyd y daith i gyd yn cyfrannu at lythrennedd corfforol person.
Mae’n bwysig archwilio a chael hwyl gyda rhieni a gofalwyr yn y blynyddoedd cynnar. Ac mae yr un mor bwysig bod yn fodel rôl ar ôl mynd yn hŷn, drwy drosglwyddo’r gwersi a ddysgwyd ac agweddau allweddol ar wybodaeth i’r genhedlaeth nesaf.
Rydyn ni eisiau i bawb, gan gynnwys plant, rhieni, teidiau a neiniau, athrawon, hyfforddwyr ac arweinwyr ifanc, chwarae eu rhan ar y siwrnai llythrennedd corfforol.