Strategaeth Chwaraeon Cymru

Gweledigaeth i bawb: Cenedl actif lle gall pawb fwynhau chwaraeon drwy gydol eu hoes.
Cenhadaeth i bawb: Cyfleu manteision chwaraeon i bawb.

P’un ai a ydych chi’n cymryd rhan, yn cefnogi, yn cyflawni neu'n llwyddo, dyma beth mae chwaraeon yn ei olygu i chi. Yn eich geiriau chi.

Gyda'n gilydd

“Dwi wir yn mwynhau dod i’r clwb a gwneud llawer o ffrindiau newydd, mae wedi rhoi teimlad o berthyn gwirioneddol i mi.”

Diogel

“Yn bennaf oll, mae’n golygu gwneud yn siŵr bod pawb sy'n cymryd rhan yn ddiogel, yn gorfforol ac yn seicolegol.  Mae pob hyfforddwr yn dilyn hyfforddiant, ac fe fyddwn ni’n cefnogi ein gilydd i wneud yn siŵr ein bod yn gwneud y lleoliad yma yn rhywle lle mae pawb yn teimlo'n gyfforddus ac yn hyderus.”

Arwain gan anghenion

“Mae ein ffordd o weithio’n canolbwyntio ar y plentyn i raddau helaeth – rydyn ni’n gwrando ar y disgyblion, ac rydyn ni’n ymateb i’r hyn maen nhw ei eisiau a’i angen. Maen nhw wir yn llywio’r sesiynau a’n cynlluniau ni.”

Twf

“Maen nhw’n cyfarfod ffrindiau tebyg iddyn nhw eu hunain ac yn dechrau datblygu eu sgiliau a meddwl alla i wneud hyn, mae gen i rywbeth i’w ddangos, dyma’r sgiliau sydd gen i.”

Cynaliadwy

“Rydyn ni’n gwneud newidiadau o gwmpas y clwb er mwyn defnyddio ynni'n well, gwneud ein rhan i’r amgylchedd ac arbed arian, sy'n golygu ein bod ni’n gallu ei fuddsoddi yn rhywle arall – mae'n helpu i ddiogelu ein dyfodol ychydig bach mwy.”

Cynhwysol

“Unrhyw un sy’n dod drwy’r drws - anabl, ddim yn anabl, hen, ifanc. Croesawu pawb, a chynnwys pawb. Rydyn ni’n cynnal sesiwn, a fyddai’r plant sy’n dod yma ddim yn cael cyfle i fod yn rhan o wers brif ffrwd fel arfer. Mae’n cael ei deilwra i’w hanghenion nhw a wir yn helpu pobl i fynd allan a bod yn actif.”

Mwynhad

“Disgyblion nad ydyn ni erioed wedi eu gweld o’r blaen - wnaethon ni erioed feddwl y bydden ni’n eu gweld nhw ar ôl ysgol - maen nhw'n dod aton ni’n hapus, ac maen nhw'n gadael yn hapusach hyd yn oed.”

Pawb

“Gall pobl sydd ddim yn siarad Saesneg ddod yma a mwynhau’r chwaraeon. Mae gennym hyfforddwyr sy'n siarad mwy nag un iaith er mwyn i ni allu darparu ar gyfer y gwahanol gymunedau lleol.”

Bod yn sefydliad arloesol sy’n ei gwneud yn bosibl i chwaraeon ffynnu yng Nghymru – pryd bynnag, ble bynnag, sut bynnag – a hynny am oes.

Rhagoriaeth mewn chwaraeon

Byddwn yn clywed yn aml iawn am achosion lle mae chwaraeon wedi gwella lles, hunanhyder a chymhelliant pobl; bod chwaraeon wedi rhoi'r sgiliau i bobl gyrraedd eu potensial a chyflawni eu nodau; bod chwaraeon wedi dod â chymunedau at ei gilydd a’i fod wedi hyrwyddo Cymru i’r byd drwy ragoriaeth ar y llwyfan byd-eang.

Effaith gadarnhaol

Mae digon o dystiolaeth i gadarnhau’r effaith gadarnhaol y mae cymryd rhan mewn chwaraeon yn ei chael ar ein bywydau – boed hynny drwy gymryd rhan, cefnogi, cyflawni neu lwyddo – ac mae yna bobl ysbrydoledig yn gweithio’n ddiflino ledled Cymru i greu cenedl actif. Dyna pam ein bod ni’n angerddol am ein gwaith ac am y bobl rydyn ni’n gweithio gyda nhw.

Esblygu o hyd

Mae’r byd yn esblygu’n gyson, ac er mwyn i chwaraeon barhau i fod yn berthnasol i bobl yng Nghymru mae angen i ni wneud yn siŵr ein bod yn dal i fyny â’r newidiadau ac yn addasu ein ffordd o weithio. Allwn ni ddim parhau i wneud yr un pethau a disgwyl i bobl barhau i werthfawrogi chwaraeon. Mae angen i ni arloesi a bod yn feiddgar. Mae angen i ni chwalu’r rhwystrau gwirioneddol a’r rhai ymddangosiadol, fel bod chwaraeon a byw bywyd actif yn ddewis hwylus i bawb. Mae angen i ni herio ein hunain i feddwl yn wahanol ac ymddwyn yn wahanol.

Credu mewn newid

Mae Chwaraeon Cymru yn credu mewn newid. Rydyn ni’n credu yn ein partneriaid ac yng ngrym chwaraeon – ac rydyn ni’n barod i roi gwybod i bawb am hynny. Byddwn yn cysoni ein diwylliant, yn atgyfnerthu ein credoau ac yn ysgogi ein hased mwyaf: Pobl.

Cyfleoedd amrywiol

Wyddon ni ddim bob amser beth yw rhesymau pobl dros fod yn actif a chymryd rhan mewn chwaraeon – maent mor amrywiol a chymhleth â bywydau pobl. Dydyn nhw ddim yn aros yr un fath chwaith; maen nhw’n newid dros amser.  Mae angen i ni allu cynnig cyfleoedd amrywiol iawn os ydym am roi cyfle i chwaraeon yng Nghymru ffynnu.

Mae hyn yn golygu symud i ffwrdd o feddwl y gallwn fod yn sicr am y dyfodol, gan gymryd ein bod yn gwybod sut i ysgogi pobl i gymryd rhan mewn chwaraeon a mesur llwyddiant ar sail niferoedd yn unig.

Cael effaith

Yn hytrach, mae angen i ni gasglu tystiolaeth i wella’r hyn rydyn ni’n ei wneud drwy’r amser, a dangos yr effaith rydyn ni'n ei chael. Er bod patrymau penodol y gallwn edrych arnynt a’u gwerthuso i lywio ein gwaith, mae angen i ni dderbyn nad yw’n bosibl i ni fod yn hollol gywir bob tro.

Wrth gydnabod hyn, bydd angen i ni weithio mewn ffordd wahanol iawn. Bydd angen i ni gymryd amser i gynnwys, deall a rhannu syniadau er mwyn i ni allu datblygu cyfleoedd ystwyth ac ymatebol sy'n hwylus ac yn berthnasol i bawb.

Rydyn ni’n esblygu

Mae ein hagwedd at y ffordd rydyn ni’n gweithio, y ffordd rydyn ni’n siarad a'r ffordd rydyn ni’n ymgysylltu yn esblygu. Mae angen i ni ddod yn gyfforddus ag ansicrwydd, a gallu gweithio gyda bwriad clir yn hytrach na chyfarwyddiadau pendant, ac mae angen i ni gael ein harwain gan yr egwyddorion canlynol:

Mae rhesymau pobl dros fod yn actif a chymhellion dros gymryd rhan mewn chwaraeon yn amrywiol iawn. Dydy hi byth yn hollol bosibl rhagweld beth ydyn nhw ac maen nhw’n debygol o newid dros amser.

Rhaid i ni roi pobl wrth galon yr hyn rydyn ni’n ei wneud, gan arwain at gyfleoedd amrywiol a hyblyg i fod yn actif a chymryd rhan mewn chwaraeon – a symud oddi wrth raglenni ‘un peth yn addas i bawb’.

Mae angen i'r cyfleoedd sydd ar gael newid dros amser, gan addasu i'r adborth gan y rhai a hoffai fod yn rhan ohonynt, yn ogystal â'r rhai sy’n cymryd rhan yn barod.

Byddwn yn mynd ati i wneud y pethau hyn:

• Dysgu gyda'n gilydd - Archwilio, profi ac adolygu’n gyson.
• Cyflawni gyda'n gilydd - Rhannu canlyniadau, meithrin perthnasoedd agored a gonest, darparu adborth cadarn, gwella perfformiad yn gyson.
• Dathlu gyda’n gilydd - Cydnabod ein llwyddiant ar y cyd drwy bartneriaid effeithiol.

Drwy wneud y canlynol:

• Gweithredu gydag uniondeb - Deall a pharchu diwylliant a gwerthoedd ein gilydd. Hyrwyddo cydraddoldeb ac amrywiaeth.
• Ychwanegu gwerth - Sicrhau’r cyfuniad gorau posibl o gymorth, her, buddsoddiad, sgiliau ac arbenigedd i gyflawni ein canlyniadau cyffredin.
• Annog arloesedd - Croesawu syniadau a dulliau newydd a chefnogi uchelgais a meddwl ffres. Peidio â bod ofn teimlo'n anghyfforddus.

Rydyn ni’n cydnabod ac yn gwerthfawrogi’n llawn y rhwydwaith cryf a bywiog o bobl a phartneriaid ledled Cymru sydd eisoes yn creu dulliau arloesol o gyflwyno chwaraeon.

Er mwyn i chwaraeon ffynnu, bydd angen i ni fuddsoddi adnoddau mewn ffordd wahanol.

Byddwn yn cysoni ein hadnoddau cyfunol ac yn dod o hyd i gyfleoedd i gryfhau partneriaethau. Byddwn yn cydweithio i ddatblygu model adnoddau hyblyg. Bydd hyn yn ein galluogi i ddiwallu anghenion gwahanol y partneriaid yn well ac ymateb yn gyflym i heriau newydd.

Byddwn yn defnyddio ein holl adnoddau – buddsoddiad, gwasanaethau a phobl – yn feddylgar, yn gyfrifol a gyda’r budd mwyaf mewn golwg. Yr egwyddorion canlynol fydd yn ein tywys:

1. Atal
   Cymell gweithredu cadarnhaol i hybu gweithgareddau corfforol rheolaidd i bawb, gan flaenoriaethu grwpiau sy’n cymryd llai o ran na’r cyfartaledd ar hyn o bryd, a chyfrannu at genedl iach, actif, mwy cyfartal a llwyddiannus.
2. Y tymor hir
   Rhoi anogaeth i feddwl am y dyfodol, arloesi a rheoli risg. Cydbwyso anghenion tymor byr a thymor hir.
3. Integredig
   Partneriaid yn rhoi tystiolaeth o effaith a manteision ehangach chwaraeon.
4. Cydweithio
   Annog gweithio mewn partneriaeth a darparu adnoddau ar y cyd.
5. Cynnwys
   Cynnwys amrywiaeth o bobl wrth gynllunio a datblygu gwaith.

Gan groesawu'r egwyddor o integreiddio, rydyn ni wedi datblygu chwe datganiad o fwriad strategol gyda chanlyniadau clir. Mae’r canlyniadau sefydliadol hyn, sy’n gweithredu fel ein hamcanion lles, yn dangos beth allwch chi ddisgwyl ei weld o ganlyniad i’n gwaith ar y cyd.