Adroddiad blynyddol partneriaeth gymdeithasol 2025-26

Mae gan Chwaraeon Cymru a PCS berthynas hirhoedlog sydd wedi’i hadeiladu ar barch a chydweithredu. Mae'r trefniadau partneriaeth gymdeithasol wedi ein galluogi i adeiladu ar y sylfaen hon ac ehangu mewnbwn PCS i feysydd blaenoriaeth, gan gynnwys y nodau llesiant a meysydd polisi eraill. 

Mae cyfarfodydd chwarterol yn cael eu cynnal rhwng PCS a Chwaraeon Cymru i drafod materion allweddol sy'n ymwneud â staff, polisïau a phartneriaeth. Gall cyfarfodydd gael eu cynnull hefyd i drafod unrhyw faterion ad hoc yn ôl yr angen. 

Un newid allweddol a gyflwynwyd yn ystod y flwyddyn oedd blaengynlluniwr i gynorthwyo cydweithwyr partneriaid cymdeithasol gyda chynllunio o amgylch yr amseru disgwyliedig o ran cydweithredu a chyfraniad.

Nodau Llesiant

Mae strategaeth Chwaraeon Cymru yn hirdymor ei natur ac mae'n amlinellu chwe bwriad strategol, sy'n gwasanaethu fel y nodau llesiant. Mae'r bwriadau strategol wedi'u cynllunio i ddylanwadu ar y ffordd rydym yn gweithio ac maent fel a ganlyn:-

1. Canolbwyntio ar y person: Mae anghenion a chymhellion yr unigolyn yn arwain y ddarpariaeth, boed newydd ddechrau arni, yn anelu at wneud cynnydd neu'n ymdrechu am ragoriaeth ar lwyfan y byd.

2. Rhoi dechrau gwych i bob person ifanc: Mae gan bob person ifanc y sgiliau, yr hyder a'r cymhelliant i'w galluogi i fwynhau a gwneud cynnydd drwy chwaraeon; gan roi sylfeini iddynt i fyw bywyd actif, iach a chyfoethog.

3. Sicrhau bod pawb yn cael y cyfle i fod yn actif drwy chwaraeon: Mae chwaraeon yn gynhwysol ac yn darparu profiad gwych i bawb.

4. Dod â phobl at ei gilydd ar gyfer y tymor hir: Mae sector chwaraeon cydweithredol, cynaliadwy a llwyddiannus, sy’n cael ei arwain gan wybodaeth a dysgu ar y cyd.

5. Arddangos manteision chwaraeon: Mae tystiolaeth o effaith chwaraeon ac mae cyrhaeddiad chwaraeon yn cael ei ddeall, ei werthfawrogi, ei arddangos a'i ddathlu'n llawn ledled Cymru.

6. Bod yn sefydliad hynod werthfawr: Mae Chwaraeon Cymru yn sefydliad uchel ei barch, sy'n ymdrechu i ragori ar gyflawni drwy ddarparu patrwm o wasanaeth drwy ein staff gwerthfawr. 

Mae’r nodau llesiant yn cael eu hadolygu'n flynyddol i asesu cynnydd ac i benderfynu a ydynt yn parhau i fod yn briodol. Cynhaliwyd yr adolygiad hwn ym misoedd Mawrth ac Ebrill 2026 ac roedd yn cynnwys sawl aelod o staff yn adolygu crynodeb o gynnydd ac wedyn cyfarfod i drafod y nodau a'u perthnasedd parhaus yn ogystal â rhoi cyfle i dynnu sylw at feysydd cynnydd eraill. Mae'r adolygiad hwn wedi cynnwys PCS drwy ein trefniadau partneriaeth gymdeithasol.

Cynhaliwyd cyfarfod â thîm Gweithredol y gangen i drafod y nodau a'r cynnydd oedd wedi’i wneud, gan gyfrannu at yr adolygiad blynyddol. Mae'r adolygiad hwn wedi cadarnhau bod y nodau’n parhau i fod yn briodol. Bydd Adroddiad Blynyddol Chwaraeon Cymru ar gyfer 2025-26, unwaith eto, wedi'i strwythuro o amgylch y nodau llesiant hyn, gan ddatgan cynnydd a nodi gwersi ar gyfer y dyfodol.

Yn ddefnyddiol, mae tîm gweithredol y gangen wedi cyfrannu hefyd at yr adolygiad o gynnydd yn erbyn y nodau cydraddoldeb sydd wedi’u datgan yng nghynllun cydraddoldeb strategol Chwaraeon Cymru 2024-2028.

Penderfyniadau / prosiectau o natur strategol

Un maes allweddol o ran datblygiad yn ystod y flwyddyn oedd dull Chwaraeon Cymru o ymdrin â deallusrwydd artiffisial (‘AI’). Cydnabu Chwaraeon Cymru bwysigrwydd sicrhau cydbwysedd rhwng y cyfleoedd y mae AI yn eu cyflwyno â chadw goruchwyliaeth ddynol a gwneud penderfyniadau. Datblygwyd y polisi defnyddio AI cyntaf gyda mewnbwn arbenigol a chafodd ei adolygu a’i gymeradwyo gan PCS.

Cyflog Teg

Rydym wedi parhau i gydweithio'n agos i sicrhau bod staff Chwaraeon Cymru yn cael eu talu'n deg a bod amodau gwaith da yn eu lle. Gwnaed dyfarniad cyflog o 3.75% i'r holl staff yn unol â chylch gwaith cyflog Llywodraeth Cymru. Yn dilyn adborth gan PCS ynghylch pwysigrwydd amseriad y taliad, talwyd yr elfen ôl-ddyddio o'r dyfarniad cyflog hwn ym mis Rhagfyr, gan alluogi staff i weld y budd yn ystod cyfnod y Nadolig.

Adolygwyd amrywiaeth o bolisïau yn ymwneud â gweithlu Chwaraeon Cymru yn ystod y flwyddyn ac, ym mhob achos, gofynnwyd am fewnbwn gan PCS a’i dderbyn. Roedd PCS yn gallu dylanwadu ar y polisïau hefyd drwy gyfrannu gwybodaeth o bolisïau sydd ar waith mewn cyrff cyhoeddus eraill, gan gynnwys polisïau cyfryngau cymdeithasol.

Mae PCS yn parhau i chwarae rhan wrth werthuso swyddi newydd drwy broses JEGS i sgorio a graddio yn seiliedig ar fframwaith safonol. Mae hwn yn fewnbwn gwerthfawr gan sicrhau bod deiliaid swyddi’n cael eu digolledu'n deg am eu gwaith a'u cyfrifoldebau.

Yn ystod 2025-26, mae Chwaraeon Cymru wedi cynnal adolygiad cynhwysfawr o gaffael er mwyn ymgorffori uchelgeisiau cymdeithasol gyfrifol mewn polisïau a phrosesau. Hyfforddiant ar y dull newydd o weithredu, sydd hefyd yn cynnwys cydymffurfiaeth â Deddf Caffael 2023. Y ffocws yn 2026-27 fydd monitro cynnydd a phwysleisio'r cyfleoedd y gall caffael cymdeithasol gyfrifol eu cynnig.

Dyma’r blaenoriaethau eraill ar gyfer y flwyddyn sydd i ddod:

• nodi penderfyniadau / prosiectau strategol allweddol y dylid eu hystyried mewn partneriaeth.
• parhau i weithio gyda'n gilydd i ddarparu cyflog teg ac amodau gwaith da i staff yn Chwaraeon Cymru.
• adolygu cynnydd a pherthnasedd parhaus y nodau llesiant.